ආසියානු කුසලාන ක්‍රිකට් තරගාවලිය අරඹමින් ශ්‍රී ලංකා පිල අද (27) තරග බිමට.

ආසියානු කුසලාන ක්‍රිකට් තරගාවලිය අද (27) එක්සත් අරාබි එමීර් රාජ්‍යයේදී ආරම්භ වනවා. තරගාවලිය ආරම්භ කරමින් ශ්‍රී ලංකා වේලාවෙන් අද රාත්‍රී 7.30ට ශ්‍රී ලංකා කණ්ඩායම පළමුව තරග වදින්නේ ඇෆ්ගනිස්ථාන කණ්ඩායම සමගයි. මෙම තරගය ඩුබායිහිදී පැවැත්වීමට සියලු කටයුතු සූදානම් කර තිබෙනවා. ශ්‍රී ලංකාවේ දී පැවැත්වීමට නියමිතව තිබු 15 වැනි ආසියානු කුසලාන ක්‍රිකට් තරගාවලිය එක්සත් අරාබි එමීර් රාජ්‍යය වෙත ගෙන යද්දී, ඊට සංවිධාන ශක්තිය ලබා දෙන්නේ ශ්‍රී ලංකා ක්‍රිකට් ආයතනයයි. එළඹෙන ලෝක කුසලාන පන්දුවාර 20 තරගාවලිය සඳහා ආසියානු ක්‍රිකට් බලවතුන්ගේ පෙර සූදානමක් ලෙසින් පන්දුවාර 20 තරගාවලියක් ලෙසින් දින 16ක් පුරා වැලිකතරේ දී ක්‍රියාත්මක වෙන්නේ කණ්ඩායම් 6ක සහභාගිත්වයෙන්. එම කණ්ඩායම් 6 මුලික වටයේදී A සහ B ලෙස කාණ්ඩ දෙකකින් තරග බිමට පිවිසෙනවා. තරගාවලිය සඳහා එක්වන ඉන්දු – පාකිස්ථාන මෙන්ම ශ්‍රී ලංකා කණ්ඩායම ද සිය පුහුණුවීම් සඳහා ද එක්ව සිටියා. එහිදී කණ්ඩායම්වල ක්‍රීඩකයින් අනෙකුත් කණ්ඩායම්වල සහෘද ක්‍රීඩකයින් සමඟ සතුටු සාමිච්චියේ නිරත වූ අයුරුත් දැක ගන්නට ලැබුණා.