Local News
සජිත් ප්රෙමදාස, චම්පිකව හැලුවේ ලක්ෂමන්ගේ කීමට ද?
සමගි ජන සන්ධානය හා ගිවිසුම්ගත වූ හිටපු පාර්ලිමේන්තු මන්ත්‍රී පාඨලී චම්පික රණවක මහතාගේ එක්සත් ජනරජ පෙරමුණ පක්ෂය සමඟ එකඟ වූ කොන්දේසි කඩකර ඔවුන් සන්ධානයෙන් පන්නා දැමූ බවට සජබ නායක සජිත් ප්‍රේමදාස මහතාට එම පක්ෂ අභ්‍යන්තරයෙන් චෝදනා එල්ලවී ඇතැයි පැවසේ.
අදාළ පිරිස පෙන්වා දී ඇත්තේ මේවන විට ජාතික ජන බලවේගයට ඇති ජන රැල්ල නිසා ඉදිරි මහ මැතිවරණයේදී සමගි ජන සන්ධානයට දරුණු පසුබෑමකට ලක්වීමට සිදුවනු ඇති බවත්, එම පරාජයත් සමඟ සජබ නායක සජිත් ප්‍රේමදාස මහතාගේ නායකත්වයට අභියෝගයක් එල්ලවිය හැකි එකම පුද්ගලයා පාඨලී චම්පික රණවක මහතා බැවින් මේ තත්වය නිර්මාණය කර ඇති බවයි.
මේ කුමන්ත්‍රණය ද සජබ නිල නොවන නායකයා බව කියන ලක්ෂ්මන් ෆොන්සේකා මහතාගේ මෙහෙයවීමෙන් සිදුවූවක් බවට ද ඔවුන් චෝදනා කර තිබේ.
මේ අතර, හිරුණිකා ප්‍රේමචන්ද්‍ර මහත්මිය සමගි වනිතා බලවේගයේ ජාතික සංවිධායක තනතුරෙන් හිටි හැටියේ ඉවත්වීමට ද ලක්ෂමන්ගේ සම්බන්ධයක් ඇතැයි එම පක්ෂ අභ්‍යන්තරයෙන් වාර්තා වේ.
හිරුණිකාගේ අදාළ තීන්දුවට සෘජුවම බලපා ඇත්තේ සජබ බටහිර කොළඹ ආසන සංවිධායක ධූරය ලබාදුන් දීපිකා සඳමලී අප්සාරි සිංහබාහු තිලකරත්න මහත්මියට කොලොන්නාව ආසනය තුළ ද ඡන්ද ව්‍යාපාර කටයුතු කිරීමට සජබ නායක සජිත්ගේ බිරිඳ ජලනි ප්‍රේමදාස මහත්මිය හා ලක්ෂ්මන් ෆොන්සේකා මහතා විසින් නිල බලයක් ලබාදීම බවද පැවසේ.
මේ අතර, ඉතා කුඩා ආසන වන බියගම හා කැලණිය යන ආසන සඳහා සම සංවිධායකවරුන් පත්කරමින් එම ආසන අච්චාරු කිරීමට ද ලක්ෂමන්ගේ මැදිහත්වීම සිදුව ඇතැයි වාර්තා වේ.
සජබ ආසන සංවිදායක හා අපේක්ෂක යන තනතුරු ලැබෙන්නේ පක්ෂය වෙනුවෙන් දර දිය ඇද්ද පිරිසට නොවන බවත්, එම තනතුරු මේවන විට ලබාදීම සිදු කරනු ලබන්නේ ආර්ථික කරුණු මත යැයි එම පක්ෂයේ පැරණි ක්‍රියාකාරියකු ශ්රී ලංකා මිරර් සමඟ කියා සිටියේය.
