Local News
ලංකාවේ තනි ව්‍යවසායකයෙක් ලෙස ඉදිකළ පළමු ජාත්‍යන්තර තරු පහේ හෝටලය
ශ්රී ලංකාවේ තනි ව්‍යවසායකයෙක් ලෙස ඉදිකරන ලද පළමු ජාත්‍යන්තර තරු පහේ හෝටලය ඊයේ (30) විවෘත කරනු ලැබුවා.
එම හෝටලය කාමර 167කින් සහ ජාත්‍යන්තර තත්ත්වයේ නවීන අංග රැසකින් සමන්විතයි.
ජාත්‍යන්තර සමාගම් හෝ හවුල් ව්‍යාපාරයක් ලෙස නොමැතිව තනි පුද්ගලයෙකු විසින් මෙරටට මෙවැනි හෝටලයක් ඉදි කළ පළමු අවස්ථාව ද මෙය වීම විශේෂත්වයක්.
ජාත්‍යන්තර මැණික් ව්‍යාපාරික කහවත්තේ ඩබ්ලිව්. විනිල් මහතාගේ මුල්‍ය ආයෝජනයෙන් මෙම සුපිරි හෝටලය ඉදිකර ඇත්තේ කොළඹ කොල්ලුපිටිය ප්‍රදේශයේ යි.
එය කොල්ලුපිටිය මංසන්ධිය මැද කොළඹ මුහුදට මුහුණලා ඉදිකර තිබෙනවා.
ජාත්‍යන්තර අමාරි හෝටල් ජාලයේ කළමණාකරනය යටතේ මෙම හෝටලය පවත්වාගෙන යනු ලබන අතර එහි ඉදිකිරීම් සඳහා වසර පහක පමණ කාලයක් ගතවී ඇති බව සඳහන්.
මේ සම්බන්ධයෙන් අදහස් දක්වමින් ඩබ්ලිව්. විනිල් මහතා සඳහන් කළේ, තරු පහේ සුපිරි හෝටලයක් ඉදිකිරීමට තමන් නොසිතුවත් රටට විදේශ සංචාරකයින් ගෙන්වා ගැනීම පිළිබඳ අවධානය යොමු කරමින්, ලොව ප්‍රසිද්ධ හෝටල් ජාලයක් ඇති අමාරි සමූහයේ කළමනාකාරිත්වයෙන් මෙම දැවැන්ත හෝටලය ආරම්භ කළ බවයි.
“මෙය මට සිහිනයක්.. ඒ වාගේම රට ජාතිය වෙනුවෙන් කළ ආයෝජනයක්.. මට විතරක් නොවේ මෙහි ප්‍රතිලාභ රටට ලැබෙනවා.. තුන්සියයකට පමණ රැකියා ලැබෙනවා.. ඒ නිසා මට විශාල ආත්මීය සතුටක් දැනෙනවා.. මාගේ පියා හිටියා නම් ඔහු බොහෝ ආඩම්බර වේවි මේ ගැන..”
ජාත්‍යන්තර මැණික් ව්‍යාපාරික කහවත්තේ ඩබ්ලිව්. විනිල් මහතා