අයහපත් කාලගුණ තත්ත්වය හේතුවෙන් දිස්ත්‍රික්ක 24ක පවුල් 132,110කට බලපෑම්

අයහපත් කාලගුණ තත්ත්වය හේතුවෙන් දිස්ත්‍රික්ක 24ක පවුල් 132,110කට අයත් පුද්ගලයින් හාරලක්ෂ 41,590 දෙදෙනෙකු බලපෑමට ලක්වී ඇති බව ආපදා කලමනාකරණ මධ්‍යස්ථානය පවසයි.

එම මධ්‍යස්ථානය අද (29) පෙ.ව. 6ට නිකුත්කළ යාවත්කාලීන කිරීම අනුව මේ වනවිට පුද්ගලයින් 13 දෙනෙකු මියගොස් තවත් එක් පුද්ගලයෙකු අතුරුදන්ව ඇති අතර 20 දෙනෙකු තුවාල ලබා තිබේ.

නිවාස 102ක් පූර්ණ හානියට ලක්වී ඇති අතර අර්ධ හානි වී ඇති නිවාස ගණන 2,096කි.

පවතින තත්ත්වය හේතුවෙන් පවුල් 45,329කට අයත් පුද්ගලයින් 115,319 දෙනෙකු ඥාති නිවාසවල සිටින අතර ආරක්ෂිත ස්ථාන 347ක පවුල් 12,348කට අයත් පුද්ගලයින් 38,616 දෙනෙකු රැඳීසිටින බව ආපදා කළමනාකරණ මධ්‍යස්ථානය සඳහන් කළේය.

පවතින වැසි සහිත කාලගුණික තත්ත්වය හේතුවෙන් වැඩිම බලපෑමකට ලක්වී ඇත්තේ අම්පාර දිස්ත්‍රික්කයට වන අතර පවුල් 43,631කට අයත් පුද්ගලයින් 149,491 දෙනෙකු බලපෑමට ලක්වී තිබේ.

මහවැලි ගඟ, හැඩඔය, දැදුරු ඔය සහ මුන්දෙණිආරු සඳහා නිකුත් කළ ගංවතුර අනතුරු ඇගවීමේ නිවේදනය ඉදිරි පැය 48 දක්වා දීර්ඝ කිරීමට තීරණය කළ බව වාරිමාර්ග දෙපාර්තමේන්තුව පැවසීය.

ඒ අනුව එම ගංගා ආශ්‍රිත පහත්බිම්වල වෙසෙන ජනතාව මෙම තත්ත්වය සම්බන්ධයෙන් දැඩි සැලකිල්ලෙන් පසුවිය යුතු අතර එම ප්‍රදේශ හරහා ගමන් කරන ජනතාවට ද සැලකිලිමත් වන ලෙස වාරිමාර්ග දෙපාර්තමේන්තුවේ ජලවිද්‍යා හා ආපදා කළමනාකරණ අංශයේ වාරිමාර්ග ඉංජිනේරු ජී. ඩබ්ලිව්. ඒ සකුරා දිල්තාරා මහත්මිය පැවසීය.

මේ අතර පවතින අයහපත් කාලගුණ තත්ත්වය හේතුවෙන් දිස්ත්‍රික්ක 09ක ප්‍රාදේශීය ලේකම් කොට්ඨාස 70ක් සඳහා ගොඩනැගිලි පර්යේෂණ සංවිධානය විසින් නිකුත් කළ නායයෑම් පිළිබඳව පුර්ව අනතුරු ඇගවීමේ නිවේදනය තවදුරටත් බලපැවැත්වෙයි.

අද පස්වරු 4 දක්වා බලපැවැත්වෙන පරිදි නිකුත් කර ඇති මෙම නිවේදනයෙන් මහනුවර, කෑගල්ල, මාතලේ සහ නුවරඑළිය යන දිස්ත්‍රික්කවල ප්‍රාදේශීය ලේකම් කොට්ඨාස 25ක් සඳහා ඉවත්වීමේ රතු නිවේදන නිකුත් කර තිබේ.

මහනුවර දිස්ත්‍රික්කය

මැදදුම්බර
උඩුදුම්බර
උඩුනුවර
දොළුව
පහතහේවාහැට
හාරිස්පත්තුව
පාතදුම්බර
යටිනුවර
දෙල්තොට
ගඟවටකොරළය
උඩපළාත

කෑගල්ල දිස්ත්‍රික්කය

අරණායක
මාවනැල්ල
යටියන්තොට

මාතලේ දිස්ත්‍රික්කය

උකුවෙල
අඹන්ගඟකෝරළය
නාවුල
විල්ගමුව
යටවත්ත
පල්ලෙපොල
මාතලේ
රත්තොට
ලග්ගල
පල්ලේගම

නුවරඑළිය දිස්ත්‍රික්කය

වලපනේ

මේ අතර පවතින අයහපත් කාලගුණ තත්ත්වය හේතුවෙන් බලපෑමට ලක්වු පුද්ගලයින්ට සහන සැලසීම සඳහා ත්‍රිවිධ හමුදාවේ සහ පොලීසියේ සාමාජිකයින් 3,183 දෙනෙකු යොදවා ඇති බව ආපදා කළමනාකරණ මධ්‍යස්ථානය පැවසීය.

මේ සඳහා බෝට්ටු 239ක්, යුනිකෝන් රථ 111ක්, ටැක්ටර් රථ 40ක්, ට්‍රක් රථ 64ක් යොදවා ඇති බව ස සඳහන් ය.

ගුවන්යානා 06ක් සහ ඩ්‍රෝන යානා 08ක් ද යෙදවා ඇති බව ආපදා කළමනාකරණ මධ්‍යස්ථානය පවසයි.

එමෙන්ම පවතින වැසි සහිත කාලගුණික තත්ත්වයේ අඩුවීමක් අද දිනයේ සිට අපේක්ෂා කරන බව කාලගුණ විද්‍යා දෙපාර්තමේන්තුව පැවසීය.

මේ අතර අයහපත් කාලගුණය හේතුවෙන් හානියට පත් මාර්ග යථා තත්ත්වයට පත් කිරීම සඳහා ඉක්මනින් ගත හැකි ක්‍රියාමාර්ග සියල්ල මේ වනවිට ගෙන ඇති බව මහාමාර්ග නියෝජ්‍ය අමාත්‍ය ප්‍රසන්න කුමාර මහතා පැවසීය.