ICC නවතම ශ්‍රේණිගත කිරීම්වලින් වනිඳු ඉදිරියට.

ජාත්‍යන්තර ක්‍රිකට් කවුන්සිලයේ නවතම විස්සයි විස්ස පන්දු යවන්නන්ගේ ශ්‍රේණිගත කිරීම්වල ශ්‍රී ලංකා සුපිරි ක්‍රීඩක වනිඳු හසරංග තවත් ස්ථානයක් ඉදිරියට පැමිණ තිබෙනවා. ඒ අනුව ඔහු එම ශ්‍රේණිගත කිරීම් සටහනේ ප්‍රසාද ලකුණු 692ක් හිමිකරගෙන, ලොව හොඳම විස්සයි විස්ස පන්දු යවන්නන් අතර පස්වන ස්ථානය දක්වා ඉදිරියට පැමිණ තිබෙනවා. එම ශ්‍රේණිගත කිරීමේ ලැයිස්තුවේ පළමු ස්ථානයේ තවමත් පසුවන්නේ ඔස්ට්‍රේලියාවේ සුපිරි වේගපන්දු යවන්නා වන ජෝස් හැසල්වුඩ් වන අතර ඔහු ලබාගෙන ඇති ප්‍රසාද ලකුණු සංඛ්‍යාව 737ක්. ඒ අනුව එම ශ්‍රේණිගතකිරීම් ලැයිස්තුවේ පිළිවෙලින් දෙවන, තෙවන සහ සිව්වැනි ස්ථාන ලබා සිටින්නේ දකුණු අප්‍රිකාවේ ටැබ්‍රයිෂ් ශම්සි, එංගලන්තයේ අදිල් රශීඩ් සහ ඇෆ්ගනිස්ථානයේ රශීඩ් ඛාන් යන ක්‍රීඩකයින්. මේ අතර ලොව විස්සයි විස්ස පන්දු යවන්නන් අතර මුල් ස්ථාන පහ තුළ රැඳී සිටි ඔස්ට්‍රේලියානු දඟපන්දු යවන ක්‍රීඩක ඇඩම් ශම්පා ස්ථාන දෙකකින් පහළ වැටී තිබෙන අතර ඔහු එම ශ්‍රේණිගත කිරීම් සටහනේ 6 වැනි ස්ථානයේ රැඳී සිටිනවා. ශ්‍රී ලංකාවේ අභිරහස්පන්දු යවන්නා වන මහීෂ් තීක්ෂණ තමන් සිටි ස්ථානය රැක ගනිමින් එම ශ්‍රේණිගත කිරීම් සටහනේ 7 වැනි ස්ථානයේ රැඳී සිටිනවා. මේ අතර විස්සයි විස්ස තුන් ඉරියව් ක්‍රීඩක ශ්‍රේණිගත කිරීම් ලැයිස්තුවේ ද වනිඳු සිව්වැනි ස්ථානයෙහි රැඳී සිටින්නේ තමා රැඳී සිටි ස්ථානයේ කිසිදු වෙනසකින් තොරවයි.
මේ අතර විස්සයි විස්ස පිතිකරුවන් ශ්‍රේණිගත කිරීමේ සටහනේ මුල් ස්ථාන දහයේ රැඳී සිටින එකම පිතිකරුවා බවට ශ්‍රී ලංකා ආරම්භක පිතිකරු පැතුම් නිස්සංක සමත්ව සිටින අතර ඔහු එම ලැයිස්තුවේ 8 වැනි ස්ථානයේ රැඳී සිටින්නේ තමා රැඳී සිටි ස්ථානයේ කිසිදු වෙනසකින් තොරවයි. මේ අතර විස්සයි විස්ස පිතිකරණ ශ්‍රේණිගත කිරීමේ ලැයිස්තුවේ, පළමු ස්ථානයේ තවමත් රැඳී සිටින්නේ පාකිස්ථාන ආරම්භක පිතිකරු මොහොමඩ් රිස්වාන් වන අතර ඔහු හා පාකිස්තාන ඉනිම ආරම්භ කරන පාකිස්තාන නායක බාබර් අසාම් තුන්වැනි ස්ථානය දක්වා පහත වැටී ඇත්තේ, තමා රැඳී සිටි ස්ථානය ඉන්දීය සුපිරි පිතිකරු සූර්ය කුමාර් යාදෙව් වෙත ලබා දෙමින්. මෙම ශ්‍රේණිගත කිරීම් ලැයිස්තුවේ පළමු පිතිකරුවන් සිය දෙනා අතර පිළිවෙලින් 34, 38, 43, 55 සහ 97 යන ස්ථානවල චරිත් අසලංක, භානුක රාජපක්ෂ, දසුන් ශානක, කුසල් මෙන්ඩිස් සහ කුසල් ජනිත් පෙරේරා යන ශ්‍රී ලංකා පිතිකරුවන් රැඳී සිටිනවා. විස්සයි විස්ස පන්දු යැවීමේ ශ්‍රේණිගත කිරීම්වල රැඳී සිටින 42, 44 සහ 60 යන ස්ථානවල පිළිවෙලින් චාමික කරුණාරත්න, දුෂ්මන්ත චමීර සහ ළහිරු කුමාර යන ක්‍රීඩකයන් රැඳී සිටිනවා.