ශ්‍රී ලංකාවේ ජාත්‍යන්තර ඩොලර් බැඳුම්කර අගය වාර්තාගත ලෙස ඉහළ යයි.

ජාත්‍යන්තර මූල්‍ය අරමුදල සමග කාර්ය මණ්ඩල මට්ටමේ සාකච්ඡා සාර්ථක බවට වන දැනුම් දීමත් සමඟ ශ්‍රී ලංකාවේ ඩොලර් බැඳුම්කර වාර්තාගත වැඩිම අගයක් වාර්තා කර තිබෙනවා. මෙරටට පැමිණ සිටින ජාත්‍යන්තර මූල්‍ය අරමුදල නියෝජිත පිරිස් සමඟ සිදු කෙරෙන සාකච්ඡා සාධනීය අවසානයක් කරා ගමන් කරන බවට අද වාර්තා පළ වුණා. ඒ අතර අද ජාත්‍යන්තර මූල්‍ය අරමුදල නියෝජිතයින් නිවේදනයක් නිකුත් කරමින් සඳහන් කළේ අද දින අවසන් කිරීමට නියමිතව ඇති සාකච්ඡා වට තවත් එක් දිනයක් දක්වා දීර්ඝ කෙරෙන බවයි.
එමෙන්ම හෙට දිනයේදී ඔවුන් සාකච්ඡාවල ප්‍රගතිය සම්බන්ධයෙන් නිවේදනයක් නිකුත් කරන බවත් දැනුම් දී තිබුණා. මෙම ධනාත්මක ප්‍රතිචාරයත් සමඟයි ශ්‍රී ලංකාවේ ජාත්‍යන්තර ඩොලර් බැඳුම්කර එක් දිනකදී ලබාගත් විශාලතම ලාභ පංගුව වාර්තා කර තිබෙන්නේ. ඒ අනුව 2030 මාර්තු මාසයට නියමිත සුරැකුම්පත් ඩොලරයට සාපේක්ෂව ශත 3.6 කින් ඉහළ ගොස් ශත 34.73 ක් ලෙස ලාභයක් ප්‍රකාශ කළා. නිදහසින් පසු එහි දරුණුතම ආර්ථික අර්බුදය ට මුහුණ දෙන ශ්‍රී ලංකාව ජාත්‍යන්තර මූල්‍ය අරමුදලෙන් ඩොලර් බිලියන 3ක් අපේක්ෂා කරනවා.